有一日,老花欠眼叫其三个花欠眼儿子拎篮鸡蛋去看看其拉外婆。话完后,老花欠眼做生活去嘞。三个花欠眼儿子打算出门。老大锁门,看来看去看勿清锁扣,越张越拢,“促啦”一声,锁扣穿过其自家眼泡皮,把其自家也锁起来嘞。好勿容易弄脱后,三人出发嘞。 走了一会,老二要上路边一茅坑,其拎着鸡蛋,看到墙壁上有个钉嘴,其一边讲:嗖人噶好啦,墙上钉钉嘴,给过路人吊吊东西好足嘞,一边就把篮子吊上去。“倾跨啦”一声响,鸡蛋敲嘞得无沓泥浆噶嘞。派来得墙上停嘞只苍蝇啦,其活道得是钉嘴。
三人垂头丧气朝前走,走了交关长时间,觉得迷路嘞。老三大末之头看见路边立嘞个老头巴,戴顶帽子。其就去问:阿伯阿伯,小山村搭阿里嘎去去啦?“老头巴”勿响。其又问了几遍,“老头巴”仍勿响。大末之头,“帽子”勿见嘞。老三话:勿话把老头巴听,其帽子被风吹走嘞,噶坏老头巴。其实是路边一块大石头,上头停了只老鹰。老鹰被其啦吓走了嘞。
评论